Góðan dag :)

Í Hollandi kíkti ég við í Amsterdam. Hún er ofsa falleg borg og mikið að sjá þar. Svo mikið af fólki og mannlífi að skoða að ég hafði ekki tíma í allt hitt sem ég var búin að punkta niður..t.d. vaxmyndasafnið og svoleiðis stöff... en, ég fer bara á það í London í staðin :)

Þegar þetta er skrifað er ég búin að vera í París í nærri viku, í góðu yfirlæti hjá Hrafnhildi og Nabil. Þau eiga yndislegt hús í úthverfi Parísar og það er frábært að vera hérna hjá þeim og börnunum þeirra :)  Hrafnhildur kenndi mér á lestarkerfið og strætóana og gaf mér marga góða punkta um borgina. Svo hef ég verið á fullu að skoða og upplifa. Tók túr með túristastrætó (Hop on, hop off) til að sjá helstu minnismerkin, Sigurbogann, Eiffelturninn, Dómkirkjuna og Louvre safnið... ég hoppaði út hér og þar og rölti í kring, og hoppaði svo um borð í næsta og hélt áfram. Prýðileg leið til að sjá svona það helsta. Svo hef ég gengið og gengið... og gengið...  orðin býsna þreytt í fótunum þessa dagana :)  en það er alveg þess virði því ég hef séð alveg ótrúlega margt fallegt og skemmtilegt :)  Í gær fór ég í Louvre safnið að heimsækja Mónu Lísu og Venus de Miló... þær voru voða fínar :)  og allt hitt sem ég skoðaði líka, ég entist þó ekki nema í 2 tíma á þessu rölti.. er meira fyrir að skoða fólk en hluti :)

Dagurinn í dag verður rólegur... ég svaf frameftir og ætla núna uppúr hádeginu að fara inn í borgina og skipta einum bol sem ég keypti í gær og ganga svo aðeins meira :) :)  endalaust hægt að virða fyrir sér mannlífið og húsin í þessari borg :)

Á morgun flýg ég svo til London, fer þaðan til Cambridge og verð hjá Eddu Báru í einhverja daga :)

Er að setja inn myndir hérna í albúmin...

Á laugardaginn síðasta fór ég með Maju og fjölskyldu til Cinque Terre, sem eru 5 smábæir við vesturströndina. Á milli bæjanna eru göngustígar (meðal annars) og eru leiðirnar miserfiðar. Milli fyrstu tveggja (talið sunnanfrá) er bara 20 mínútna gangur eftir Via Dell'Amore (vegur ástarinnar), við röltum þá leið í blíðunni en tókum eftir það lestir milli bæjanna. Á þessum stíg eru skrilljón lásar, líkt og á Ponte Vecchio, þar sem pör hafa verið að staðfesta ást sína.... það er m.a.s. hægt að kaupa sérmerkta lása við "innganginn" á stíginn !!
Ég var að setja inn myndir í albúm...
Í haust  (á þeim góða degi 25.okt)  urðu þarna ægileg aurflóð eftir miklar rigningar.  Ótrúlegt að sjá hve vel hefur gengið að hreinsa til... aurinn fór í flestalla kjallara og inn í hús... en nú er búið að moka út og hreinsa og verið að mála og endurnýja gólf...
Ánum og lækjunum sem koma úr fjöllunum er veitt undir bæina í stokkum (sjá ristarnar í götunum á myndum)  en í þessum hamförum þá fylltust þeir og allt flaut út um allt og inn í húsin.
Það eru þó nógu sterk húsin þarna til þess að þau flutu ekki burt með flóðinu heldur fylltust bara.
Einungis í einum bæ sáum við hvar flóðið hafði grafið undan tröppum  framan við hús þar sem gatan lá niðurávið í beygju og straumurinn skall á með fullum þunga. Í fjallinu þar fyrir ofan var eini staðurinn þar sem ég sá sár í fjallinu þar sem losnað hafði úr því.
En, dagurinn var í heildina góður og ólýsanlega fallegt þarna, ótrúlegt hvernig bæirnir hanga utaní fjöllunum og hvernig fólk hefur í aldanna rás, ræktað vínvið og korn á handgerðum syllum í hlíðunum, fært sig og dót upp og þrúgurnar niður á heimagerðum "kláfum", borið allt á herðum sér og puðað við þetta....  ótrúleg elja.
Ég þarf eiginlega að koma þarna aftur á öðrum árstíma :)   geri það næst þegar ég kem til landsins.. eða þarnæst....


En næst á dagskrá er hádegishittingur hjá íslensku skvísunum....  og svo fer ég líklega til Rómar..
er að veltast um í valkvíðanum með allt of marga möguleika :) :)

meira um það síðar...

Ég er í því þessa dagana að reyna að taka ákvarðanir.
Ég hef aldrei verið sérstaklega góð í því.
Ég er samt að reyna...
Reyndar er dálítið gaman að velta þessu fyrir sér sem ég er að plana núna. Ég er nefnilega að reyna að setja saman dálítið plan yfir það sem ég vil gera áður en ég yfirgef Ítalíu og líka það sem ég vil gera áður en ég yfirgef meginland Evrópu....
Ég er komin með nokkur atriði á blað... búin að stroka út og skrifa aftur.. og aftur...  og aftur...
Ég var alltaf með það á heilanum að ég yrði að fara heim í maí því mig langar að upplifa vorið hérna (og vorið í Hollandi og Frakklandi og Englandi...)
EN.. það er svosem alveg komið aðeins vor í apríl... alveg nóg....
Ég hef nefnilega ekki nóg að gera í mars og apríl til að komast hjá því að verða dálítið klikkuð af aðgerðarleysi á meðan beðið er eftir vorinu.
EN, ef ég flýti þessu um mánuð... þá er ekki nema mánuður þar til ég legg af stað heim... eða sirka það... verð svo nærri mánuð á leiðinni...
Á þessum mánuði sem eftir er hérna ætla ég þá að heimsækja vini mína hérna enn einusinni 
(maður heimsækir nefnilega vini sína ekki of oft)   kíkja í skreppitúr til Rómar....
Stoppa kannski aðeins við í hinni fallegu Veróna... og jafnvel, ef ég stytti ferðina þá hef ég kannski efni á að taka aðeins meiri málaskóla... jafnvel þá í Veróna... eða einhversstaðar...
Kíkja svo aðeins á sitthvað merkilegt á norður Ítalíu og enda í Mílanó og fljúga þaðan til Amsterdam...  ég er alveg búin að sjá það að eftir dýran lestarrúnt um Ítalíu verður ljúft að fljúga fyrir smápeninga milli stórborganna...
Þannig kostar lest milli Flórens og Veróna (1,5 klst) 35 Evrur....  Flug frá Milanó til Amsterdam með EasyJet kostar ca það sama!!!  Lestir í Evrópu eru orðnar rosalega dýrar... fargjöldin hafa hækkað jafn mikið þar eins og þau hafa lækkað í fluginu !

Vá... það eru svo mörg ÉG í þessum pistli !!  Nú held ég að sálfræðingurinn minn yrði ánægður !!

hehe

Meira síðar.... ætla að demba mér í smá valkvíðakast fyrir svefninn :)